भंडारा तालुक्यातील आंबाडी गावात चहाच्या टपरीवर रानडुकराने घुसून धडक दिल्याने जखमी 📍संपूर्ण प्रकार टपरीवरील सीसीटीव्ही कॅमेऱ्यात कैद 

भंडारा तालुक्यातील आंबाडी गावात चहाच्या टपरीवर रानडुकराने घुसून धडक दिल्याने जखमी

📍संपूर्ण प्रकार टपरीवरील सीसीटीव्ही कॅमेऱ्यात कैद 

सुकदर्शन वृतांत 

भंडारा : तालुक्यातील आंबाडी गावात भरदुपारी चहाच्या टपरीवर बसलेल्या नागरिकांमध्ये अचानक रानडुकराने घुसून एकच गोंधळ उडविल्याची घटना घडली. या घटनेत एका इसमाला रानडुकराने जोरदार धडक दिल्याने तो जखमी झाला.संपूर्ण प्रकार टपरीवरील सीसीटीव्ही कॅमेऱ्यात कैद झाला असून,या घटनेमुळे परिसरातील नागरिकांमध्ये भीतीचे वातावरण निर्माण झाले आहे.

मिळालेल्या माहितीनुसार, सोमवारी दुपारच्या सुमारास आंबाडी गावातील काही नागरिक नेहमीप्रमाणे चहाच्या टपरीवर बसून गप्पा मारत होते. त्याचवेळी अचानक भरधाव वेगाने एक रानडुक्कर त्या दिशेने धावत आले. अनपेक्षितपणे समोर आलेल्या रानडुकराला पाहताच टपरीवरील नागरिकांची एकच धावपळ उडाली. अनेकांनी जीव वाचवण्यासाठी सैरावैरा पळ काढला.

या गोंधळात एक इसम रानडुकराच्या तावडीत सापडला. रानडुकराने त्याला जोरदार धडक दिली. धडकेमुळे तो खाली कोसळून जखमी झाला. त्यानंतर रानडुक्कर तेथून वेगाने पसार झाले. जखमी इसमाला स्थानिकांच्या मदतीने उपचारासाठी हलविण्यात आल्याची माहिती मिळाली आहे.

हा संपूर्ण थरार सीसीटीव्ही कॅमेऱ्यात कैद झाला असून, त्याचा व्हिडिओ परिसरात मोठ्या प्रमाणावर व्हायरल होत आहे. गावाच्या वस्तीपर्यंत रानडुकरे पोहोचत असल्याने नागरिकांनी तीव्र चिंता व्यक्त केली आहे. वन विभागाने तातडीने उपाययोजना करून रानडुकरांचा बंदोबस्त करावा,अशी मागणी ग्रामस्थांकडून करण्यात येत आहे.

गेल्या काही काळापासून वन्यप्राण्यांचा मानवी वस्तीकडे वावर वाढत असल्याच्या घटना वारंवार समोर येत आहेत.त्यामुळे ग्रामीण भागातील नागरिकांच्या सुरक्षिततेचा प्रश्न पुन्हा ऐरणीवर आला असून, वन विभागाने या प्रकाराची गंभीर दखल घेण्याची अपेक्षा व्यक्त होत आहे.